Қызылорда десе, әзілкештер жел мен ағаш жайлы айтпай кетпейді. Жел дегеніңіз түсінікті. Табиғатының мінезі ғой. Ал тал-дарақтың аз болуының түрлі себеп-салдары бар. Негізінде Сырдың бойында бұрын жиде, сексеуіл, жыңғыл секілді ағаштарыңыз сыңсып өсіп тұратын. Ит мұрыны батпайтын тоғайлар болатын. Осы нудың барлығы отынға жағылды. Алдымен ауыл-аймақтың айна­ласындағы жылуы мол ағаштар кесілді. Онан соң Бетпақдала мен Қызылдың құмындағы сексеуіл, жыңғылдарыңыз қырқылды. Былайша айтқанда, даланы жала­ңаштап алуға өзіміздің де кесіріміз тиді. Бірақ оған ешкімді кінәлай алмайсың. Өйтпесең, қыста қатып қаласың.

Ендігі онжылдықта сол ну то­­ғайлар қайта қалпына келе­тін шығар деген үміт бар. Неге? Өйткені, биылдың өзінде Қызыл­орда облысының төрт аудан орта­лығына және Байқоңыр қаласына газ жетті. 2017 жылға дейін ай­мақ­ты түгелдей көгілдір отынмен қам­ту жоспары тұр. Қазіргі қар­қынға қарасақ, жоспардың то­лық орын­далатынына сенесің. Ал осы­дан кейін ағаш кесілмейді. Ол дегеніңіз айналасы аз жылдың ішінде дарияның бойы жайқалып шыға келеді деген сөз.

«Бейнеу – Бозой – Шымкент» газ магистралі Қызылорда облысын қиялай өтіп жатыр. Мына игілікті іс осының арқасында жүзеге асып жатқанын айтқанымыз абзал. Бұл үшін Қызылорда облысының әкімдігі мен «ҚазТрансГаз Аймақ» АҚ арасында меморандум жасалды. Соған сәйкес барлығы 23 миллиард теңге инвестициялық қаражат есебінен 4 аудан орталықтарында, атап айтқанда Арал қаласы, Әйтеке би, Шиелі және Жаңақорған кенттері мен Байқоңыр қаласында автоматтандырылған газ тарату стансаларының құрылысы мен квартал ішілік газ құбырларының құрылысы жүргізілді. Жобада 1300 шақырымдай газ құбыры, 5 автоматтандырылған газ тарату стансасы, 13 газ реттеу пункті және 174 шкафты шеттеу пунктінің құрылысын салу қаралған.

Өткен қазан айында Арал қаласы, Әйтеке би, Шиелі, Жаңа­қорған кенттерінде автомат­тан­дырылған газ тарату стансалары іске қосылып, тұрғындарға табиғи газ берді. 5 елді мекен бойынша құрылыс жұмыстарын жыл аяғына дейін толық аяқтау жоспарлануда. Аталған жобалар жүзеге асқанда облыстың 63 па­йызы табиғи газбен қамтамасыз етіліп, шамамен облыстың 209 мың тұрғыны ілеспе газға қол жеткізетін болады.

Сондай-ақ, Қызылорда қала­сына қарасты Қызылжарма ауыл­дық округін және Тас­бөгет кентін газдандыруға рес­публикалық және облыстық бюджеттер есебінен 2014-2015 жылдарға жалпы 2,1 миллиард теңге қаржы бөлінді. Тұңғыш Президент күніне орай аталған елдімекендер толықтай көгілдір отынға қосылды.

Сонымен қатар, «ҚазТрансГаз Аймақ» АҚ-тың 10,5 миллиард теңге инвестициялық бағ­дарламасы арқылы облыстың қалған 3 аудан орталықтары мен Қызылорда қаласындағы газдандырылмай қалған тұрғын үйлерді келер жылы табиғи отынға қосу жоспары бар. Бұдан басқа, 2016 жылға 10 жобаның құрылысына 6,9 миллиард теңге құрайтын республикалық бюджеттен қаржы бөлу үшін тиісті министрліктерге бюджеттік өтінімдер жолданған.

Сондай-ақ, 2016 жылға облыс­тық бюджет есебінен «Қызылорда қаласындағы Талсуат ауылдық округін және үш әлеуметтік қам­тамасыз ету нысандарын газбен жабдықтау» жобасының құры­лысын жүргізуге 271 миллион теңге қаржы қарастырылуда.

Жоғарыда айтқанымыздай, Қызылорда облысы 2017 жылға дейін толық газдандырылып бітеді. Осылайша, қарапайым халық отын жағып, көмір түсіріп, күл шығару секілді күйбең тірліктен арылады.

Ержан БАЙТІЛЕС,

«Егемен Қазақстан».

Қызылорда облысы.